4h50 isch mi Wecker gange. Dr Jungfroumarathon wartet. E mini Motivation isch zwar da, aber sie isch ou scho dütlech grösser gsi. Mit ere gwüsse Glichgültigkeit vielleich ou Lockerheit, bi ig de mit Kollega Josty mit em Zug richtig Interlake gfahre. Startnumme hole, parat mache und hoffe, dass es nid zu fescht schiffet.
8h30 het dr deftig Böller dr Start zum Jungfroumarathon signalisiert. Ig bi denn no gmüetlech ir Kollone vorem ToiToi gstande… 😕 Nid so schlimm, denn z’erschte mau het dr Start i Blöck stattgfunde.
Ig ha de am 8h50 über d’Startlinie chönne jogge. Ou wes uf de erschte 4-5 Kilometer nid grägnet het, darf me wou säge, dass d Usgab vom JFM 2017 im Duurräge stattgfunde het. Mau hets chli meh abe gla u mau chli gnislet. Für Zueschauer isch das Wätter sicher unagnähmer gsi als für d’Löifer. Temperature si agnähm gsi u mi het sich ja ou mit es paar Chleider usem Rucksack säuber chönne ushälfe.
Gmüetlech bi ig i mim Tempo los. Churz nach em Start ha ig e Ex Arbeitskolleg, ou e Beat, troffe. Het mi gfröit die paar Meter mit Dir z’jogge. Ig hoffe sehr, das dini Marathonpremiere guet verloffe isch.
Trotz misem Wätter hets uf dr ganze Strecki viu Zueschouer gha. Die hei richtig Stimmig gmacht wie ou die unzählige Bands ungerwägs. Treichler, Gugge, Steelbänds, Örgeler, Bassischte, Musikgsellschafte, Alphornbläser, Dudelsackspieler… Das motiviert mega.
Vor Luterbrunne het mi de Brige no überholt und churz später ha ig ou d Monique no troffe. Mi isch nie allei ungerwägs. Ig ha mi wohl gfühlt. D Stimmig in Luterbrunne isch wie immer wieder hüehnerhutmässig gsi. Geil! Rasch isch me de scho mau ir Häufti (Halbmarathon) gsi. No Zuesatzschloufe bevor es de wieder zrügg in Luterbrunne richtig zur Sach geit. Letscht Jahr bi ig dert i d’Wand gloffe u es isch nümme viu gange. Das Jahr het das anders usgseh. Problemlos ha ig d’Stigig nach Wänge gmeischteret. Wos isch flächer worde ha ig ou wieder chönne jogge. Yeah, so guet!
Viu Lüt ou wieder in und um Wänge. Witer geits via Allmend Richtig Wixi zue. Dr Buch macht kei Problem, d’Scheiche möge guet u Schnuf ha ig ou no. Ig chumme dütlech besser vorwärts als vor em ne Jahr. Bir Station Wixi isch e Weiche. Dert wärde d’Löifer teilt, so das es weniger Stou git. Vor mir het d’Weiche grad gwächslet. So ga ig links und gseh vor mir kei einzige Löifer meh. Das isch das wo ig gärn ha. So cha ig i mim Tempo vorwärts cho u muss nid im Gänsemarsch nache loufe. Kilometer 39 verbi u z’Ziel isch nümme wit obschons für die letschte 3 Kilometer no viu Zyt brucht.
Witer obe chömme die zwe Streckine wieder zäme. Logisch dass es dert rasch chli Stou git. Mi muess chli stah während angeri Löifer versuche näbe füre z’drücke. Schad und unnötig. Denn da obe gwinnsch kes Renne meh u ob jetzt e Minute früecher oder später im Ziel bisch isch wohl ou egal. Im Gänsemarsch geits de eher gmüetlech ufwärts uf d’Moräne. Verbi bim Dudelsackspieler wo dert bi Wind, Räge u Näbel vor sich häre duddlet. Immer schön dä z’gseh. De weiss me das me obe isch. No über Schoggipass u de hinger Abe richtig Ziel. Ig chas no guet la loufe und ig gniesse dr Zieliilouf sehr. D’Emotione stige u z’Füschtli wird ballet. Ig bi happy, dass ig dr Marathon i 5 Stund u 20 Minute gmeischteret ha. Genials Gfühl einisch meh.
Z’Zielbier mit em Josty wo chli zügiger isch obe gsi als ig, gniesse mir zäme. Aber chaut u unagnähm isch es. Mir entscheide üs die chlini Scheidegg müglechscht rasch z’verlah. Rasch ga dr Rucksack suche, umchleide und ab i Zug u via Grindelwald nach Bärn zrügg.
Viu ha ig die Saison träniert. In Giverola viu Kilometer gsecklet und ou es paar mau uf Bantiger und uf em Niese gsecklet. Dr Staffellouf von Bieler 100 Kilometer ha ig wäg Knöiproblem nid chönne mache. Im Ouguscht isch dr Glacier 3000 Marathon brutal (unfreiwillig) z Änd gange. Dafür isch dr Jungfrou Marathon jetzt e würdige Abschluss. Abschluss? Hmmm, mau luege 😉
Gratulation!!