Teneriffa mit Päpu

Tag 1: Sodeli, die 2 Wyss Manne si guet in Teneriffa a cho. Gäbige Flug hei mir gha. Z Mietouto hei mir de ou gfunde. Z’ersch, ufem richtige Parkplatznummero bim ne schöne Audi gstande u fröid gha. Aber isch de mit üsem Schlüssu nid uf gange. När, bim richtige Vermieter de üsi Trucke gfunde. Jetzt fahre mir haut e Renault Clio. Aber dä macht ou Spass. När si mir de scho mau chli ga käsche. Bim erschte Cache kei PP gfunde. Dr zwöit Cache nid gfunde‍. Bir dritte Trucke het aber de aues klappet‍. Im Süde isch schön sunnig gsi u agnähm warm. Die churze Hose u es T-Shirt het beschtens glängt. In „Las Americanos“ hets no ne coole Virtual Cache gha. Dert hets de ou z’erschte Bier gä. Sehr gmüetlech ar Promenade. De si mir übere Pass, ca. 1200m höch, gäge Norde zue tuckeret. Het de im Norde meh Wolke gha. Nach öppe 90min si mir im Appartement a cho. Es gäbigs Wohnigli für e Wuche mit schönem Blick i d’Bucht wo doch rächt grossi Wälle a d’Felse brätschet hei. Herrlech!
Jetzt i puffnet, düschelet und de gli was ga ässä. Spät wirds hinech nid. Morn geits ume uf Pischte.
WIFI hei mir leider nur ir Lobby. Tja, aber das isch öppe z chlinschte Problemli.

 

Album Tag 1

 

 

 

 

 

 

 

 

 

 

Tag 2 neigt sich ou langsam (viu z schnäu) am Ändi zue. Zum z’Morge hei mir es super feins Frühstückbuffet gha. Es fählt nüt. Gstärkt si mir uf e 12er Cacherundi. Am Afang no flankiert vo Spanische-Soldate si mir losmarschiert. Aber d’Army het nid wöue cache. (Höseler…) Mir hei haut de säuber gsuecht u hei aues gfunde. Mega schöni Wanderig gsi. 320Hm u 6km düre super schöne Wald. Ja u de isch haut ersch 12h30 gsi wo mir bim Parkplatz si gsi. Es paar Cache uf dr Teidestrass hei mir no zäme gsammlet. Ou no e sehr coole Abstächer ufe 2350m höch Mostsza gmacht. Ig ha nid ufe wöue, aber Päpu scho 😉 . Vorhär hets natürlech no es Bierli zum Durscht lösche gä.
Hei de d’Gägend bis zur Talstation vor Teidebahn no gsüberet vo Caches u die gwaltigi u sehr iidrücklechi Landschaft gnosse. Ungloublech schön u mir chömme nomau. Ächt cool. De ume hei gfahre u üs jetzt am retabliere…

Ig bi düschelet u parat für z’Nacht. Päpu de ou öppe. Hei ume e herrlech schöne Tag zäme dörfe verbringe. Es paar Sunnestrahle schicke mir natürlech ou i d’Schwiz.

 

Album Tag 2

 

 

 

 

 

 

 

 

 

 

 

Mir hei scho Tag 3. Zum z’Morge wieder aues gha wo me brucht u ou nid brucht. Kichererbsen bruchts nid wüu mirs eh guet u luschtig hei. Röselichöhli bruchts ou nid wüu er gruusig isch.
Gstärkt si mir gäge Süde uf 1000m ufe gfahre. Hüt e Wanderig im Loorbeerwald. Am Afang im Schatte u für mi z chaut. Aber für e Päpu agnähm. Wo mir de a d’Sunne si cho si de beid Wyss häppy gsi, aber när isch dr Näbu leider ou no cho…
D’Sandwich hei glich gschmöckt u zwüschedüre het d’Sunne ou düre möge. Si de när ume as Meer abe gfahre. E coole Lost Place Cache gfunde aber wäg em gsperrtem Pfad nid richtig häre chönne. De zum Appartement zrügg u no 3 Cache „UHU“ (Ums Huus ume)gmacht. Ou am „Strand“ unger gsi wo d’Wälle es mega schöns Schouspiu zeigt hei. Richtige Lärm vo de Steine wos im Zügs ume schlaht. Z’Bier u Chips hets hüt im Appartement uf dr Terrasse gä. Jetzt duschet u gli ga luege ob mir was bessers zum z’Nacht finde als geschter bim Italiänische Dütsche. Wird äuä nid so schwierig si.

 

Album Tag 3

 

 

 

 

 

 

 

 

 

 

Tag 4. Königswanderig. Super Wätter u kei Rosekohl me zum z’Morge. Zäme gäge Teide zue gfahre. Uf 2’450m parkiert u zäme losgloffe u käschet bis ufe Montaña Blanca. Hei vorher no chli chnörz gha mit em Outo und Schlüssu. Die hütige Outos bruche nur Schlüssle u hei kei Zündschloss meh. Päpu ha ig la usstige, mit Schlüssu im Rucki und ig bi ga Parkplatz sueche. Ha dr Motor nid chönne absteue ohni Schlüssu. De haut abgwürget. U abgschlosse isch es ou dr ganz Tag nid gsi…
Item. Si de uf 2’750m ufe gwänderet bi de Lavaeier verbi. Dr Päpu isch de ufe Montaña Blanca uf knapp 2’800m. Ig bi de no ufe Teide 3’550m ufe. Viu Touris mit wisse Socke und säge mir, nid grad bärggängige Schueh dert obe. Gruusig. Bi de froh gsi ume chönne abwärts z’loufe. Päpu isch ou abe gloffe u het ou no es paar Cache gsammlet. Er het de no z’Outo müesse sueche.
Aues gut gange und mir hei enand am 17h30 wieder gfunde. Obe abe fahre u es wunderschöns Näbumeer überem Meer gseh und ou gnosse. Ungerwägs ga z’Nacht ässä. Menu. Gmischte Salat, Rindsgulasch, Dessert u Kafi inkl. 1/2 Wein. 10€ pro Nase.

De no Outo tanket u grad hei. Ab unger Duschi u när öppe no es Füürabe-Bierli gno. Geeeeniale Tag gsi. Und Sonne pur ohne nur ei Wolke.

 

Album Tag 4

 

 

 

 

 

 

 

 

 

 

Dr hüttig Tag 5 het üs i Nordoste vor Insle gfüehrt. Dert het e attraktivi Suone für e schöni Wanderig glockt. Pünktlech am 9i si mir los gfahre. Dr letscht Teil bis zum Parkplatz isch sehr steil gsi. Het üs fasch z Outo g’chehrt. De no grad chönne chehre u gschickt parkiert. Churzum später hei mir dr Suonewäg gse u scho gli si mir im Kanal inne gwanderet. Dür Tunnels, über Brügge und aues brav am Fels entlang. So hei mir üs gar nid chönne verloufe. Viu z schnäu isch dä mega cool Wäg fertig gsi. Beid hei Gaudi gha. Nach em Lunch isches übere Höhewäg und e Gipfel mit toller Ussicht zrügg zum Renault in blau gange.
Dr gross wiss Lüchttürm ar Küschte isch üs scho lang im Oug gsi. Müglechscht nach häre fahre isch dr Plan gsi. Si de haub ihre Bananeplantage glandet u hei de no es Gatter müsse überchlättere‍. Bingo! Hei de ou no e Cache gseh im Dorf vor, wo me guet hät chönne parkiere. Si de aber ar Küschte na füre gloffe. Dert hets de ou ändlech es verdients Bier gä. De ume zrügg zum Outo. Via Lüchtturm u Gatterüberquerig si mir wieder uf dr Bananeplantage bim Charre gsi. Hei fahre u no churz ga Süesses shoppe. Apero und fit mache fürs z’Nachtässä. Mau luege wo mir lande u was es git.

 

Album Tag 5

 

 

 

 

 

 

 

 

 

 

Hüt am Tag 6 isch di glösti Puzzleserie uf em Program gstande. Am 9i wieder ab gäge Süde. Mi sött nid immer am Navi troue, denn mir wäre nach alter Methode schnäuer bim Start gsi.
Cache si chli chrütz u quer ir Prärie gläge. Mir hei üs de chli ufteilt. Ig bi scho mau düre Canyon is Eländ gloffe. Mit kraxle ha ig e Suonekanal erreicht. De ar Suone entlang, über Brügg dür e Tunnel glich no as Ziel cho. Ha chli länger gha als erwartet aber henne cool gsi. Ha de wyt müesse ga chere. Wo ig bi zrügg cho isch Päpu emu ou scho höch im Hoger obe am Dose sueche gsi. Hei immer per SMS Kontakt gha u abgsproche wer, wie, was u wo. Teamleischtig haut. Hei üs de schlussänds ou uf em ne Gipfel troffe u zäme z’Vieri gmampfet und d Ussicht gnosse.
Ufem Rückwäg, z Santiago del Teide, hets ar Sunne de es Bier gä. Ufem witere Rückwäg ire sympathische Beiz z‘ Nacht gässe. I üsem Dorf de no i Beckerei ga Dessert ässä u Kafi trinke. Jetzt daheim u wüu mir dummerwis no Bier im Kühlschrank hei, trinke mir no es. Einisch meh e sehr usgfüllte Tag. Beid si happy und gsund und ou chli müed.

 

Album Tag 6

 

 

 

 

 

 

 

 

 

 

Letschte Tag. Tag 7. Es paar mau si mir bi däm Kapäuelli, höch ufem Hoger oberhalb Puerto de la Cruz, verbi gfahre. Hüt isch es fällig gsi. E churze Spaziergang ufem Bergchrützwäg. Obe de e tolli Ussicht uf Puerto de la Cruz gseh. Si da nachhär uf Punta Brava abe gfahre u ar Küschte nah dür Puerto Cruz gloffe. Viu Tourischte und grossi Hotel. So wie ig/mir üs Ferie äbe nid vorsteue. Het de no Bier und Pizza gä ar Promenade bi de Bäder hinger. Dr ganz Wäg ume zrügg gloffe. Isch witer gsi als mir dänkt hei. Aber glich ou no es paar schöni Hüser gseh.
Beid hei letscht Nacht nid so gut pfuuset. (Z’viu Kaffee?!? 😯 ) Gut si mir scho 15h30 im Zimmer gsi. Päpu no chli ga pfuuse u ig a Pool ga plegere. Gli geits no zum letschte Ferieabschlussnachtässä. Denn heissts Köfferli packe u morn morge am 7i Abfahrt a Flughafe und zrügg i di chauti u gruusegi u nassi Schwiz.

 

Album Tag 7