Spitzhorli 2’376 m, oder vom Winde verweht

Läck het das gwindet hüt. U da ig mit de drei flotte Walliserdame dr ganz Tag ha dörfe Walliserdütsch lose, gits jetzt no chli Bärndütsch.

Pünktlech hei mir üs ufem Simplonpass troffe. Rasch si mir parat gsi und ou d’Sunne het sich nümme lang hingerem Berg u de Wolke versteckt. Also Abmarsch. Es isch rasch warm worde und d’Jagge isch i Rücksack gwanderet. Aber je witer ufwärts mir cho si, desto meh Wind het üs um d’Ohre blase. Z’Vreni het de mau es vermeintlechs windgschützts Loch gfunde. Rasch öppis trinke u dr Chopf schüttle, wo mir die andere mit em Baby gseh hei… Aber item.

Mir si wieder usem Loch kroche und si witer ufsgtige. Näbem Tochuhorn düre und i d’Oschtkurve. Vo dert hei mir nid direkt ufe chönne. E grobi Wächte und viu Wind het üs dr Wäg versperrt. Mir si de unger düre zur Üsseri Nanzlicke. Es isch eim wieder mal bewusst worde, dass me eifach nur e Furz isch i de Bärge. Dr Schlussufstieg zum Chrütz isch nid würklech schwierig gsi. Aber we dr Wind eim Schnee als Gratispeeling verpasst, chas mit dr Zyt ou langsam unagnähm wärde. Aber aui si ganz obe a cho. D’Malojachappe vor Birgit hets aber de pressant gha und dr Wind hets se grad mal dr Bärg ab gwindet. Unger bitzeli windige Verhältniss hei mir üs konzentiert Abfahrtsparat g’macht. Ig bi auso no nie uf mini Ski und Stöck g’chnöilet, für dass se dr Wind nid dervo blast.

Aber aui heis irgendwie gschafft. Süferli si mir de ufem herte Schnee abe gfahrte. Ungerhalb dr Nanzlicke isch es sozsäge windstill gsi. Mir hei mau üsi Tenü grichetet und d’Oschterflädli verdrückt. Ufem Gipfel häts de dä Chüechli schön dr Puderzucker verblase. Wo mir aui ume grichtet si gsi und ou d’Haar usem Gsicht gno hei, si mir witer abegfahre. Uf dr ganze Abfahrt hei mir wohl aui Schneeverhältniss gha. Dr Pfludi am Schluss, bevor mir uf Blattu P.1900 si cho, het mir u mim Chnöi no fasch am beschte passt. Nomal uffälle und knapp 100 Höhemeter zrügg uf Simplonpass loufe. Öppis z’Ässä hei mir üs jetzt verdient. Zur Chässchnitte hets es leckers Weissbier gä. Die schöne Dekohühner hei mir aber nid dörfe mit nä.

So e coole und verwindete Tag. Aber üses Lache und die gueti Stimmig het dr Wind nid mit gno. Merci viu mau Birgit, Christine und Vreni. Das het gfägt! Gärn ume mau.

Zu de Fotos: