Auso nei, nid ganz Barfuss. Aber mit Barfussschuh. G’chouft in China. Dr Text zum Artiku „Trailrunning Barefoot Schuhe mit breiter Zehenbox und Zero Drop Sohle“, tönt doch viuversprächend. Dr Priis 12 CHF de eher weniger. Auso ab ga teschte.
Testgländ: Ramslauenen – Gerihorn – Giesigrat – Sattelhore. Retour via Obere Gumpel – Underbachli nach Ramslouene. 1’200 Höhemeter, 11.2 km.
Mit dr Sässubahn ufe isch scho mau super u ohni Problem gange. Pflästerli si immer im Rucksack. Aber hüt ou no d’Ersatzschueh. Mi weiss ja nie. Denn mau losloufe übere Wanderweg. Am Elektrozun verbi. D’Leitig ha ig nid teschtet. U de eifach ufwärts über Gras, Wurzle und Steine zum Gerihorn. Ohni Problem. Mi gspürt sehr gut uf was me louft. Di ganz spitze Steine laht me de besser usse u dr Stachudraht sowieso. Denn mi gspürts de grad sofort. Nach em Gerihore geits de über es paar Metalbügle abwärts. Di gspürt me no guet. Auso e Chlättersteig wär mit dene Schueh äuä nid so agnähm. D’Leitere wo später isch cho, isch öppe grad glich vom Gfühl här. Aber süsch isch es, es sehr achtsahms und liechts loufe. Macht würklech no Spass und ou wäglos geit. De bi ig ufem Sattelhore mau a cho. Dr Ufstieg isch gschafft. Schueh und Füess überchömme e Pouse und ig ou. Ig bi gspannt ufe Abstieg.
Z’ersch geits e Wiese ab. Ufem Gras isch es super zum loufe. Später isch de mau es Schneefäld im Wäg. Da dr Schnee pflodi isch gsi, bi ig das Schneefäld umgange. Wott ja nid grad nassi Füess. Aber nid viu später muss ig de churz übere Schnee. Über e gueti Spur geit das problemlos. Es wird soagr agnähm chüehl unger uf. Nach em Schnee wieder Gras bis de Gröll isch cho. Dert isch ou süsch vorsicht bote. Gröllzone gmeisteret u de chunnt nomau Schnee. Dert schmeisse ig Steine druf, das ig e Brügg ha. Über Chuehpfade geits witer abwärts und es macht immer no Spass. Z’Bächli näbe dran plätschert und ladt i für es Fuessbad. Natürlech ohni Schueh. Het ou mega guet ta. Denn no ar Fahrstrass abwärts und uf Teerstrass ufe zur Beiz. Das isch no chli Pflicht gsi und weniger dr Hit.
Fazit zum 12 Franke Schueh. Mega bequem und kei Blattere oder süsch es Bobo’s. Schmärze ar Färse u Chnöi ha ig scho vorher gha. Meh isch es aber nid worde. Ig ha ou jederzyt z’Gfühl gha, dass ig sicher uf em Untergrund stah. Egal ab Stei, Gras, Schnee oder so Chuehflade. Kei Usrutscher oder Misstritt. Ig wirde sicher wieder mit Barschuehfuss unterwägs si. Es schön und anders Wandergfühl. Aber sicher ou nid für jedi Tour dr perfekt Schueh. Und wenns nass wird sowieso nid. D’Wanderig isch eifach ou mega schön gsi. Aber lueg doch d’Fotos. Genuss pur dr ganz Tag.
