Was wosch meh? Augstmatthorn

Am 1. Juli um 19:15 bi ig mit Chäschüechli und Bier eigentlech fertig gsi mit däm Tag. Aber dr Tag het no kes Dessert gha. Darum ha ig mis Ruckseckli nomal packt.

Obschon d’Wätter App kei Räge gmäldet het, ha ig uf dr Fahrt nach Habkere es paar Tropfe uf dr Windschutzschibe gha. Umchehre? Öppe nid. Mis Outo isch z’Einzige gsi ufem Parkplatz uf dr Lombachalp. Wer wott nach em ne Rägetag no ufs Ougschtmatthorn ufe? Ig! Auso loufe ig am Achti Null Null mau los. Dr Wäg isch matschig und d’Sunne schint d’Grasflanke vom Ougschtmatthorn wunderschön u klar a. Nach em Waldstück gseh ig z’ersch Chüeh am grase. Scho gli gumpet mir es Gemschi entgäge. Es luegt mi verdutzt a, laht sich churz Fotografiere und verschwindet de im Gebüsch. Vom Oschte här zieht plötzlech Näbel uf. Es zwöits Gemschi verschwindet ir graue Landschaft. Ig gseh nümme viu u frage mi ob es rändiert no ufe z’ga. D Frag isch rasch beantwortet. Es rändiert immer.

Ig loufe witer ufe. Vo Steiböck kei Spur. Dafür lichtet sich dr Näbu langsam wieder und macht dr Sunne Platz. Churz bevor ig dr Grat erreiche, gseh ig zwe alti Steiböck. Und die stöh genau dert wo ig se möcht ha. Schön usgstellt zwüsche Sunne und mir ufem Vorgipfel. Ig ploudere chli mit Ihne und mache viu Fotos. Z’einte schöner als z’andere. Was für e Momänt. Ig loufe no chli übere Grat ufe u abe und gseh no es paar Gemschi. Ig isse d’Ovo Güetzi vo mire Lieblingsschefin Angela. Was wosch meh als settig Momänte. Sehr wertvoll würd d’Michelle säge. Zwöi Jahr isch es her… Gäuet ihr Zwei! Und ig danke und tanke!

Nomau go ig zrügg zu de Böck. Ig hocke häre und gniesse die letschte Sunnestrahle wo üs entgäge lache. D’Steiböck stöh zwüsche drin und verschwinde de gmüetlech links abe. Ig go de grad abe und gemüetlech zrügg zum Outo. Dr Fäldhas hopplet rasch zrügg i Wald. Ig rolle abwärts, putze daheim di dräckige Schueh und go sehr z’Fride ga pfuuse. Es rändiert immer!

Link zu de Fotos: